مختارات من واوات احمد وردانى

تاعبنى كترك يا مالى

خلانى فى الظلم ماشى

لوجنبى اهلى وعيالى

تكفينى لقمة وماشى


يادنيا حملك عليا

ده انا لسه زهرة فى عودك

نسيت ماليا وعليا

ما فاكر الا وعودك


نخلك يا غزة بلا ساق

وعربنا باعوا القضية

وجملنا تايه بلا ساق

الطف يا رب البرية


من كتر دمعى بقى انهار

ورمش عينك تاعبنى

والليل فى بعدك بقى نهار

خايف عوازلك تعيبنى


يللى عيونك بتدبح

فى القلب ولا يوم تسمى

شايف كلابك بتنبح

لو ناوية على قلبى سمى


يا موجة فى البحر مالك

اياكى ناوية تبيعى

ده انا ربى فى العرش مالك

ونبينا هو تبيعى


عمرك يا ولدى تلاتين

وسواد فى شعرك ما لاقى

تزرع فراولة تلاتين

والكوسة مالية ملاقى


يا مصر قمحك حصدناه

ما لقينا غير تبن ليكى

مش ممكن احنا حسدناه

وشبابنا ما تبنى ليكى