انا والبطيخ وهواك

انا والبطيخ وهواك


برنامج للحب وعن الحب مع المذيع ابو لمعه قصدى اللامع سالم الجعار
(الحب هو ذلك الشعور الذى يزغزغ المشاعر والاحاسيس ويهشك القلوب)
مستمعينا لسه بنتكلم عن الحب وحلقتنا النهاردة عن( الاستهبال فى الحب )
معاكوا سالم الجعار على نجوم أف ام مزيكا على كيفك ومزاجك
انا والبطيخ وهواك من دلوقتى ولمدة ساعتين مستنى تليفوناتكم على 0333او على 8555022او على ايميل البرنامج على هواك آت نيله راديو دوت نص كوم لزوم الصيف برعاية ابليس كومبانى وكريم زحلقها وكوكاكولا
دايما بتمر بينا اوقات بنحس فيها اننا مش قادرين نعيش من غير الحب ومن غير الحبيب والشعور دا متولد من الاحساس الفسيولوجى التكنولوجى الموجود فى اللامركزيه العسكرية للقلب
ودايما بنقابل مواقف كلها استهبال فى الحب ياترى بنعمل اية؟ ورد فعلنا بيكون اية
لما تلاقى حد بيستهبل فى الحب خصوصا ان احنا جيل موبيلات ونت؟
وانتوا عارفين ان انا عندى 16سنه يعني حاسس بيكوا وبمشاكل الجيل كله
_اولا – الرصيد اللى بيخلص فى يوم وانت لسة شاحن كارت بـ100ج وعمال تحرق فى دقايق على حبيبتك وفى الاخر الرصيد يقرب يخلصتقولها بحبك بحبك امممموووه تقولك انت بتستهبل اتلم بقه احسن ساويرس يشوفنا
_ ولا حبيبتك اللى تفضل تكنسل فى وشك عشان استخسرت فيها كوزين دره علي الكورنيش وانت اصلا مفلس ومش لاقى تاكل ولما تيجى تصالحها تكنسل فى وشك فتضطر تصالحها بكارت بـ5 ج تلاقيها تصرخ فى وشك وتقولك انت بتستهبل اقل من 200ج متورنيش وشك
_ولا حبيبك اللى يجي فى اوقات يعملك فيها عالم فلك ويقولك انا بقرأ الكف ويفضل يفعص فى كفك ويمسك ايديكى ولاكأنه شاف ايدين قبل كدة وفى الاخر تقوليله انت بتستهبل احسن حد يشوفنا وانتوا اصلا في الشارع
مستمعينا الاستهبال فى الحب حالة بتمر بيها كل المهابيل والمهاطيل من ابناء الجيل ولو مستخدمناش عقلنا فى الاستهبال بيقلب عباطه وممكن مغص كلوي
مستمعينا لسه مستني تليفوناتكوا على 0333 او على 8555022
ونستقبل اول اتصال تليفوني ونقول الو
الو ـالو وضح ان الخط قطع
الو ايوه يا ثالم
اهلا نتعرف بيكى انا بثمه من طنطا
اهلا بيكى يابسمه ياريت تعلى صوتك شويه
معلش ياثالم اصل بكلمك من تحت البطانيه

مفهوم عشان محدش يقفشك وانت بتتكلمي بسمه احنا بنتكلم انهارده عن الاستهبال فى الحب تقدرى تقوليلى الاستهبال فى الحب بيمثلك ايه؟
بص ياثالم انا بموووت جدا طحن فى البرنامج بتاعك والله مش بفوت
اى حلقه منه ابدا خالث وثلملى على الواد الشقى الحكروت مووت حتومه
وقوله انه لذيذ أوووى وبحبه أوووووى
ثالم انا بكلمك عشان حلقة النهاردة مخصوص عشانى اصل انا كنت بحب واحد فى تانية ابتدائى وفضلنا نحب فى بعض لحد الجامعه
_جميل
اهـء اهـء اهـء اهـء
لا اهدي يا بسمه وقوليلى حصل اية؟
اهـء اخد كل حاجة كل حاجة ياثالم اهئ اهئ
احممم حتى الموبايل يا بسمه
ياثالم بقولك كل حاجه كل حاجه اهئ اهئ
طب اهدى يابسمه بصى يابسمه الحب شعور متبادل بين اتنين مينفعش يكون من طرف واحد ولازم الاتنين يكونوا متفاهمين ومتعاونين هو دا الحب اللى هيدوم
ونحل كل المشاكل اللى بتقابلنا حتى مشكلة غسيل الالوان مع الابيض لان تايد برغوته الجديده حل المشكلة مستمعينا نسينا نقول ان تايد من رعاة البرنامج
مع تايد فى الغسيل مفيش مستحيل
بشكرك يا بسمه على اتصالك وبهديكى اغنية النجم عمرو دياب الجديدة

ياقاعدة على الترعة وبتغسلى مواعين

جاتك ستين نيلة دا شرفك بقى فى الطين

نص ساعة اعلانات
انا والبطيخ وهواك
برنامج للحب وعن الحب مع سالم الجعار
الحب لحظات من الامل متولدة داخل الغابات القلبية للانسان فالحياه بدون حب كالشجرة بدون موبايل
مستمعينا لسه معاكوامستنين تليفوناتكوا على 0333 اوعلى 8555022
ومعانا اتصال تيلفوني ونقول الو الو
اهلا نتعرف بيكى ياريت تعلى صوتك عشان الصوت بعيد اووى
معلش اصل انا بكلمك من الحمام انا اسماء من المنصورة
اهلا بيكي يا اسماء اسما النهاردة بنتكلم عن الاستهبال فى الحب اية رايك فيه؟
سالم انا عاوزه اقولك انت احلى واجمل اعلامى واعذب صوت شوفته فى حياتى
وانا بسجل كل الحلقات بتاعتك وبحبك اووووى مووووت ياسلومه
ربنا يخليكى ياسماح

انا كنت بحب واحد نجار مسلح وبعدين كنت فى يوم ماشيه فى الشارع لابسه
بنطلون محزق اووووى وباضي جميل ضيق اوووى صدرى هينط منه
وبعدين واحد عاكسنى فحبيبي شلحف
سورى مين يا اسماء؟
شلحف هو اسمه شادى بس انا بدلعه شلحف قام ضارب الواد بالعتلة فتح دماغه
وحبيبى دلوقتى فى السجن وانا بحبه موووت واهلى بيضغطوا عليا عشان اتجوز واحد قد ابويا سالم انا مش عارفه اعمل ايه؟
بصى يا سيده انا اسماء
سوري بصي يا اسماء بنقابل ناس فى حياتنا بنحبهم ويحبونا ودايما بنكون زيهم فى حاجات كتير وحبيبك انشاء الله هيطلع بالسلامه
بس تعرفي لو العتله دي مصنوعه من حديد عز اكبر مصنع فى الشرق الاوسط
والمصدر الرسمى لحديد الجدار العازل كان زمان حبيبك مشنوق عشان حديدعز بيتميز بالصلابة
شكرا ليكى ياساره على اتصالك وبهديلك اغنية محمد فؤاد

يا مسجون فى ليمان طره نفسى اكل معاك كوز دره

ومعانا اس ام اس كتييييييييييييييير انهارده
- هاى ياسلوم انت معسل اوي وانا بحبك وبحب صوتك اوووي صوتك بيريحني
ولا احسن علبة دوا اسهال ريهام الدلوعه
-...........................................................................................
-هاى يا سالم انا محمود من الاردن ياريت تقول لهبه عمرنا ما هنفترق ابدا ابدا
مهما غلى ابوها فى طلباته بحبك اوووي يا هبابى
................................................................................................
-هاى ياسالم ازيك يا جميل انا بحب برنامجك موووت وانت كمان تحفه
وياريت تقول لجابر حبيبي ميزعلش منى ابدا رغم كل اللى بيعمله ورغم انه بيعمل حاجات وحشه كتيييير بس برضه بحبه طحن .
................................................................................................
هاى ياسالم ازيك يا جميل انت احلى واجمل واعذب صوت في الكون كله
ارجوك قول لحبيبي عليش انه مهما دور على حد يحبه مش هيلاقي حد يحبه ويسامحه ويغفر له كل حاجه غيري لاني بحبه ومش عايزه منه حاجه خالص حتي الموبايل اللى ضربه من يومين وباعه واشترى بيه حشيش. بدريه الفقريه
............................................................................................
هاي يا سالم ياعم شوفلك حل دا حبيبتي بتحبك انا بعجر من دمياط
بحبك اووووى يارضوى
......................................................................................


-هاي ازيك ياسلوم انا عايزة ايميلك عشان فيه موضوع هام اوى وعايزة اخد رايك
فيه انا تعبانه مووووووت ياسالم وانت الامل الوحيد ليا. شوشو
..................................................................................................
هاى انا عيوشه من شبرا وبحب واحد من الصعيد واتخانقنا مع بعض بس لما سمع الحلقه اللى فاتت من برنامجك جاني من الصعيد ماشى ووقف تحت البلكونه وقالي سامحيني يا عيوشتي وانا بحبه اوووى خالص .بحبك يا هريدي خالص
....................................................................................................

العوافي انا عباس من جراجوس ابويا مش عاوز يجوزني قولى اعمل ايه أطخه عيارين
ولا ارميه فى الساقية بحبك قووي يا سعديه
....

الوقت عدا معاكوا أوام كنت معاكوا على مدار ساعتين سالم الجعار على نجوم اف ام مزيكا علي كيفك ومزاجك في انا والبطيخ وهواك

بشكر كل اللي كلمونا واللي راسلونا واللي عبرونا بـ SMS

استنونا كل يوم أحد بعد صلاة الجمعة مباشرة علي نجوم FM