قصيدة مكنتش اعرف (احمد وردانى )

قصيدة
مكنتش اعرف
مكنتش اعرف ان حبك مر خادع
واما سبت القلب تايه قلت..راجع
مركزى الخامس فى حبك ولا سابع
مكنتش اعرف
ان بحر الخوف راجعلى يدق بابى
مديت ايديك وانا كنت مش عامل حسابى
تسالني شر .. وبكل خير اتلى جوابى
مكنتش اعرف
انى لما اعشق بجد اكون جبان
ان دنيا الحب ماتت من زمان
وان شجر القسوة رح يطرح حنان
مكنتش اعرف
ان لون النور فى عينك كان سراب
انك انتى عاملة على قلبى اكتتاب..
للى يقدر واللى يسهر..
واللى يدفع مهر اكتر..
وانتى بتلمى الحساب
مكنتش اعرف
كنتى عاملينى فى ايدك زى سلعة
شارى..بايع وانتى وكانك ما سامعة
ولا ترحمى قلبى اللى دايب..
نازلة بتهدى بكتايب..
وانا فى عيونى سايب..
واقعة دمعة ونازلة دمعة
مكنتش اعرف
ان روح الغدر عندك حاجة سهلة
انى ما انسى حاجة ..جوة القلب داخلة
آمنت ليكى ..وكنت بيكى...
فاكر ان الدنيا احلى
مكنتش اعرف
انى لما اغلط واحبك تجرحينى
واما اصون حبك .. بيدك تدبحينى
لاجل جرحك ..سبت فرحك
وفى الحقيقة انا بانى صرحك..
ليه بغدرك تحذفينى
مكنتش اعرف
ليه تبيعى قلب شارى ؟؟
ليه بيدك قدتى نارى ؟؟
ليه رسمتى الخوف فى قلبى ؟؟
ليه تبيعى وكنتى جنبى ؟!
ده انتى جرمى وانتى ذنبى..
طعنتى قلبى فى قلب داري
مكنتش اعرف
ان حبك ليا كان ضايع وزايف
ان طعم الغدر باين فى الشفايف
ان ليه قلبك يبان مكسور وخايف
ضعتى منى .., وكنتى منى..
ضيعت نفسى معاكى انتى ..
ضاعت طفولتى ويا سنى ..
وللآسف قاعد وشايف!!!
مكنتش اعرف
انى مهما احب فيكى مش هينفع
ان شوق قلبى اليكى مش هيرجع
ان كلك .. حتى ضلك..
واى شى تانى فاضلك..
حتى عينك مش بتدمع
مكنتش اعرف
وادينى عرفت ان انتى امل خاين
وشفت الغدر فى عنيكى آهه باين
ولا بانى عشانك بيت ..ولا ضلة ولا مداين
خلاص هارحل .. ومش هازعل..
وهامشى فى سكتى واوصل..
خلاص هابقى انا الداين
حييت من بعد موتى سنين ..
خلاص ما فاضلشى عندى انين
ونور سكتى ربى واهى بتبين
نصيحة باقولها للحبيبة والعاشقين:
لو الايام هتضحكلك ..تقولشى آميين
ولا تبقى جبان زيي وتبقى حزين
راجع نفسك ..ورا همسك
وخد بالك ومن امسك
عشان متكونشى مالمجانيين !!!!!!!!!!!!!!
الا يادنيتى شوفى جزى طيبى ومعروفى
زرعت الورد بكفوفى وبكفوفى جنيت اشواك

احمد وردانى – شاعر لم يشعر به ا حد************

الله الله يا سيدي..
"مكنتش أعرف" انك شاعر
لكن أنا دلوقتي بشعرك "شاعر"

عشرة على عشرة

اخى احمد احيييك واحيى قلمك الابنودى لنا فخرنا عن قنا
وانت ياحمد لنا فخراااا عن قريه جراجوس امنياتى بالتوفيق
محمد يوسف فرغلى \